衣物急救8個冷知識！咖啡漬、唇膏漬、血漬… 清洗原來有唔同方法？

发布时间：2026-01-02 07:36

清洗有血渍的衣物，先用冷水冷敷去血迹 #生活常识# #日常生活技巧# #衣物护理技巧# #衣物洗涤方法#

喺日常生活中，衣物上經常都會出現各式各樣嘅污漬，例如豉油漬、咖啡漬、酒漬，甚至係血漬。覺得好煩惱，唔知點先可以洗走啲污漬？等編輯教你8個常見嘅衣物污漬急救方法，幫你輕鬆洗走污漬，讓衣物回復原來狀況！

圖片來源：網絡圖片｜撰文：Tiffany

衣物急救冷知識｜1. 豉油漬

豉油漬可以話係最常見、亦都係令人最頭痛嘅衣物污漬。如果嗰日咁啱著咗淺色衫，被豉油濺到就更加顯眼。用普通水點搓都搓唔甩？原來係因為要靠另一款「水」！只要喺污漬下墊一塊毛巾，然後將梳打水倒於有豉油漬嘅地方，再用毛巾輕印豉油漬，重覆幾次就搞掂！如果無梳打水，使用透明嘅碳酸飲品代替其實都可以。

想去除豉油漬，原來只需靠一支梳打水！（圖片來源：網絡圖片）

衣物急救冷知識｜2. 咖啡漬

唔小心倒瀉咖啡，或者斟咖啡時被彈到？想對付咖啡漬，其實好簡單！可以先嘗試將衣物放入鹽水中浸泡10分鐘，再按正常清潔程序清洗。如果效果唔夠顯著，可以將白醋或小梳打粉（或將兩者混合）倒於咖啡漬處，然後用溫水輕輕搓洗，過水後再放入洗衣機就得。

衣物急救冷知識｜3. 酒漬

白酒漬就話透明、唔覺眼，如果係紅酒漬咁點算？原來可以「以酒攻酒」！當酒灑到衣物上時，即時嘅處理方法先係用紙巾吸乾多餘液體，然後用酒精（可選擇將酒精噴到紙巾上，或者直接使用酒精消毒片）覆蓋於酒漬上幾分鐘，再輕擦污漬處。返到屋企再用清水、白醋、少量消毒酒精嘅混合物，浸泡衣物最少1個鐘，過水後放入洗衣機清洗即可。

一招「以酒攻酒」，立即洗走紅酒漬！（圖片來源：網絡圖片）

衣物急救冷知識｜4. 果汁漬

除咗咖啡漬、酒漬之外，果汁漬都令人好懊惱。小朋友特別容易倒瀉果汁，所以果汁漬急救法，絕對係爸媽們必學！要清除衣物上嘅果汁漬，可以用沐浴露或酒精搓揉，再用清水沖乾淨。另外，將食鹽灑於污漬處後輕輕搓洗，再放入洗衣機，都係對付果汁漬嘅好辦法。

衣物急救冷知識｜5. 油漬

平時煮飯嘅時候，少不免會有油彈到衣物上。當清洗沾上油漬嘅衣物時，建議可以將少量平時用嚟洗碗嘅洗潔精，或者普通麵粉，塗抹喺油漬處，然後先用溫水輕輕搓洗、再用清水沖洗，最後連同洗衣液，放入洗衣機清洗。

衣物急救冷知識｜6. 唇膏漬

著衫、換衫嘅時候，唔小心將唇膏印咗上件衫到？如果衣物出現唇膏漬，其實只要簡單地用平時用開嘅卸妝水或卸妝油，直接清潔及搓洗污漬處，之後再用清水沖乾淨就得。其他化妝品漬，例如胭脂、粉底，亦係同樣道理！

只要用卸妝水或卸妝油輕擦，就可以去除唇膏漬、化妝品漬。（圖片來源：網絡圖片）

衣物急救冷知識｜7. 血漬

唔小心整傷咗，又或者女士經期時，不慎令衣物沾有血漬？原來可以用「食物」解決！將生薑磨成泥狀，加入少量清水，然後塗抹於血漬處，反覆搓揉就可以將血漬清除。仲可以選擇用白蘿蔔：將白蘿蔔切片，於衣物血漬處嘅正反兩面各鋪上一塊白蘿蔔片，然後反覆搓揉，就能清除污漬。如果係亞麻布料、針織布料等較難清理嘅衣物料上嘅污漬，就可以試吓用檸檬汁加鹽水，去血漬嘅效果會更好。